முப்படையினருக்கும் ஜனாதிபதி பாராட்டு!!

தேசிய பாதுகாப்பிலும் பிராந்திய பாதுகாப்பிலும், முப்படையினர் உட்பட பொலிஸ் மற்றும் புலனாய்வுத்துறை மேற்கொண்டு வரும் அர்ப்பணிப்புகள் பாராட்டத்தக்கதாகும் என, ஜனாதிபதி மைத்ரிபால சிறிசேன தெரிவித்துள்ளார்.

பெலவத்த, அக்குரேகொடவில் நிர்மாணிக்கப்பட்டுள்ள, புதிய இராணுவத் தலைமையகத்தை திறந்து வைக்கும் நிகழ்வில் இவ்வாறு குறிப்பிட்டார்.
தேசிய பாதுகாப்பு, நாட்டின் பௌதீக அபிவிருத்தி மற்றும் மக்கள் நலன் பேணல் நடவடிக்கைகளில், முப்படையினரும் மேற்கொண்டு வரும் பணிகள் பாராட்டத்தக்கது.

எனது 5 வருட பதவிக் காலத்தில், பாதுகாப்பு அமைச்சர் என்ற வகையிலும், ஜனாதிபதி என்ற வகையிலும் நடைமுறைப்படுத்திய அனைத்து நடவடிக்கைகளையும் வெற்றி கொள்வதற்கு, முப்படையினர், பொலிஸார் உள்ளிட்ட அனைத்து பாதுகாப்பு தரப்பினரும் எனக்கு வழங்கிய பங்களிப்புகளுக்கும் நன்றி தெரிவிக்கின்றேன்.
என குறிப்பிட்டுள்ளார்.

கொழும்பு பெலவத்த, அக்குரேகொடவில் நிர்மாணிக்கப்பட்டுள்ள, புதிய இராணுவத் தலைமையகம், இன்று திறந்து வைக்கப்பட்டுள்ளது.
புதிய இராணுவ தலைமையக வளாகத்திற்கு சென்ற ஜனாதிபதியை, இராணுவத்தளபதி லெப்டினன் ஜெனரல் ஷவேந்திர சில்வா வரவேற்றார்.
மரியாதை வேட்டுக்களுடனும் இராணுவ அணிவகுப்பு மரியாதையுடனும் ஜனாதிபதிக்கு வரவேற்பு அளிக்கப்பட்டது.
நினைவுப் பலகையை திரை நீக்கம் செய்து, ஜனாதிபதி மைத்ரிபால சிறிசேன, இராணுவ தலைமையகத்தை ஜனாதிபதி திறந்து வைத்தார்.
பெலவத்த, அக்குரேகொடவில், 77 ஏக்கர் நிலப்பரப்பில் நிர்மாணிக்கப்பட்டுள்ள பாதுகாப்பு அமைச்சு மற்றும் முப்படைத் தலைமையகத்திற்கு, 2011 மார்ச் மாதம் 11 ஆம் திகதி அடிக்கல் நடப்பட்டது.

இதற்கான உத்தேச செலவு 53.3 பில்லியன் ரூபாவாகும் என்பதுடன், இலங்கையில் இதுவரையில் நிர்மாணிக்கப்பட்ட பாரிய கட்டிட நிர்மாணத்திட்டம் இதுவாகும்.

அதி நவீன வசதிகளுடன், அதிநவீன பாதுகாப்பு முறைமைகளையும் இந்த கட்டிடத் தொகுதி கொண்டுள்ளது.

முப்படைகளின் தளபதியான ஜனாதிபதி மைத்ரிபால சிறிசேனவின் வழிகாட்டலில், இதன் நிர்மாணப் பணிகள் விரைவுபடுத்தப்பட்டதுடன், பாதுகாப்பு அமைச்சு, முப்படைத் தலைமையகம் ஆகிய கட்டிடத் தொகுதிகளின் முதற்பணிகள் நிறைவு செய்யப்பட்டு, இராணுவத் தலைமையகமும் அலுவலக கட்டிடத் தொகுதியும் திறந்து வைக்கப்பட்டது.

அந்த வகையில் இலங்கை இராணுவ தலைமையகத்தின் கீழ், தற்போது நாட்டின் பல்வேறு பகுதிகளிலும் உள்ள தலைமை அலுவலகங்கள், விரைவில் இந்த கட்டிடத் தொகுதிக்கு மாற்றப்படவுள்ளது.

அத்துடன், இராணுவ தலைமையகத்தின் பல்வேறு பிரிவுகள், கொழும்பு மற்றும் அதனைச் சுற்றியுள்ள பல்வேறு பிரிவுகளில் அமைந்திருப்பதுடன், வாடகைக்கு பெறப்பட்டிருந்த கட்டிடங்களுக்காக மாதாந்தம் செலவிடப்பட்டுவந்த 50 மில்லியன் ரூபாவுக்கும் அதிக தொகையை, இதன் மூலம் மீதப்படுத்த முடியும்.

இந்த நிகழ்வில், அதிகாரிகளுக்கான சேவை பதக்கங்களும் சிவில் பணிக்குழாம் உறுப்பினர்களுக்கான சேவை பதக்கங்களும், ஜனாதிபதி மைத்ரிபால சிறிசேனவினால் வழங்கி வைக்கப்பட்டன.

அத்துடன், ஜனாதிபதிக்கும் விசேட நினைவுச் சின்னமொன்று வழங்கி வைக்கப்பட்டது. இந்நிகழ்வில், பாதுகாப்பு இராஜாங்க அமைச்சர் ருவன் விஜேவர்தன, பாதுகாப்பு அமைச்சின் செயலாளர் ஜெனரல் ஷாந்த கோட்டேகொட மற்றும் முப்படைகளின் தளபதிகள் உள்ளிட்ட பாதுகாப்பு தரப்பினர்கள் கலந்துகொண்டனர். (சி)

Recommended For You

About the Author: Editor

error: Content is protected !!