ஜனாதிபதி தஜிகிஸ்தானுக்கு விஜயம்

ஆசியாவில் கலந்துரையாடல் மற்றும் நம்பகத்தன்மையை கட்டியெழுப்பும் நடவடிக்கைகள் பற்றிய 5 ஆவது மாநாட்டில் பங்குபற்றுவதற்காக, ஜனாதிபதி மைத்ரிபால சிறிசேன, இன்று தஜிகிஸ்தானுக்கு விஜயம் செய்துள்ளார்.

ஆசியாவில் கலந்துரையாடல் மற்றும் நம்பகத்தன்மையை கட்டியெழுப்பும் நடவடிக்கைகள் பற்றிய மாநாடு, ஆசியாவில் நம்பகத்தன்மையை கட்டியெழுப்பும் செயற்பாட்டிற்கு அவசியமான ஆசியாவின் சமாதானம், பாதுகாப்பு மற்றும் உறுதித்தன்மை ஆகியவற்றை மேம்படுத்துவதற்கான ஒத்துழைப்பை வழங்கும் நோக்குடன், 1992 ஆம் ஆண்டில் தாபிக்கப்பட்ட பல்-தேசிய மாநாடாகும்.

இலங்கை இதன் அவதானிப்பு நாடொன்றாக 2012 ஆம் ஆண்டிலிருந்து செயற்படுகின்றது.

இலங்கையானது, ஆசியாவில் கலந்துரையாடல் மற்றும் நம்பகத்தன்மை ஆகியவற்றை கட்டியெழுப்பும் நடவடிக்கைகள் பற்றிய மாநாட்டின் ஒரு உறுப்பினராக, அதன் 26 உறுப்பு நாடுகளால், 2018 ஆகஸ்ட் 15 ஆம் திகதி ஏகமனதாக ஏற்றுக்கொள்ளப்பட்டது.

உறுப்புரிமையானது உறுப்பு நாடுகளுக்கும் இலங்கைக்கும் இடையிலான இருதரப்பு உறவுகள், பொருளாதார மற்றும் வர்த்தக ஒத்துழைப்பு மற்றும் ஏனைய உறுப்பு நாடுகளிலுள்ள மக்களுக்கு இடையிலான தொடர்புகள் ஆகியவற்றை மேம்படுத்த உதவியாகவுள்ளது.

உறுப்பு நாடுகளில், ஆப்கானிஸ்தான், அஸர்பைஜான், பஹ்ரைன், வங்களாதேஸ், கம்போடியா, சீனா, எகிப்து, இந்தியா, ஈரான், ஈராக், ,ஸ்ரேல், ஜோர்தான், கஸகஸ்தான், கிர்கிஸ்தான், மொங்கோலியா, பாகிஸ்தான், பாலஸ்தீனம், கட்டார், கொரிய குடியரசு, ரஷ்யா, தஜிகிஸ்தான், தாய்லாந்து, துருக்கி, ஐக்கிய அரபு இராச்சியம், உஸ்பகிஸ்தான், மற்றும் வியட்நாம் ஆகியன உள்ளடக்குகின்றன.

இதன் 5 ஆவது மாநாடு, நாளை மற்றும் நாளை மறுதினம் ஆகிய திகதிகளில் தஜிகிஸ்தானின் துஷான்பே நகரில் நடைபெறுகின்றது.

இதில், ஜனாதிபதி மைத்ரிபால சிறிசேன, 15 ஆம் திகதி இடம்பெறும் அரச தலைவர்கள் மாநாட்டில் விசேட உரையாற்றவுள்ளார்.

தனது மூன்று நாள் உத்தியோகபூர்வ விஜயத்தின் போது, ஜனாதிபதி மைத்ரிபால சிறிசேன, தஜிகிஸ்தான் ஜனாதிபதி உள்ளிட்ட அந்நாட்டின் முக்கிய பிரதிநிதிகளை சந்தித்து கலந்துரையாடவுள்ளார். (சி)

Recommended For You

About the Author: Editor

error: Content is protected !!