சவுதி அரேபியா சபாநாயகர் – ஜனாதிபதியை சந்தித்தார்!

சவுதி அரேபியாவின் சபாநாயகருக்கும், ஜனாதிபதி மைத்திரிபால சிறிசேனவுக்கும் இடையில் சந்திப்பு ஒன்று இடம்பெற்றுள்ளது.

இலங்கைக்கு வருகைதந்துள்ள சவுதி அரேபியாவின் சபாநாயகர் கலாநிதி அப்துல்லா பின் மொஹமட் பின் இப்ராஹிம் அஷ் ஷெயினுக்கும் ஜனாதிபதி மைத்திரிபால சிறிசேனவுக்கும் இடையில் நேற்றைய தினம் சந்திப்பு ஒன்று இடம்பெற்றுள்ளது.

ஜனாதிபதி செயலகத்தில் குறித்த சந்திப்பு இடம்பெற்றுள்ளது.

இரு நாடுகளுக்குமிடையே பாராளுமன்ற தொடர்புகளை விரிவுபடுத்த நடவடிக்கை எடுக்கப்படுமென சவுதி அரேபியாவின் சபாநாயகர் தெரிவித்ததுடன், இதற்கான புதிய உடன்படிக்கை ஒன்றை ஏற்படுத்திக்கொள்ள எதிர்பார்ப்பதாகவும் தெரிவித்தார்.

இலங்கைக்கும் சவுதி அரேபியாவுக்குமிடையிலான ஒத்துழைப்பை பல துறைகளில் விரிவுபடுத்தல் தொடர்பாக இதன்போது கலந்துரையாடப்பட்டதுடன், சவுதி அரேபிய நிதியத்தினூடாக இலங்கையில் பல்வேறு அபிவிருத்தி செயற்பாடுகளுக்கு நீண்ட காலமாக வழங்கப்பட்டுவரும் உதவிகளுக்கு சவுதி அரேபிய அரசாங்கத்திற்கு ஜனாதிபதி நன்றி தெரிவித்தார்.

மேலும் ஹஜ் யாத்திரிகர்களுக்கு வழங்கப்படும் வசதிகள் தொடர்பாக ஜனாதிபதி பாராட்டு தெரிவித்ததுடன், எதிர்வரும் காலங்களில் அதிகளவிலானோர் ஹஜ் யாத்திரையில் ஈடுபடுவதற்கு சந்தர்ப்பம் வழங்குதல் தொடர்பில் கவனம் செலுத்துமாறும் சவுதி அரேபியாவின் சபாநாயகரிடம் கேட்டுக்கொண்டார்.

ஹஜ் யாத்திரிகர்களுக்கான வசதிகளை விரிவுபடுத்துவதற்கான நடவடிக்கைகள் தற்போது மேற்கொள்ளப்பட்டு வருவதுடன், அந்நடவடிக்கைகள் நிறைவடைந்ததன் பின்னர் ஜனாதிபதியின் வேண்டுகோளை நிறைவேற்ற நடவடிக்கை எடுப்பதாக சவுதி அரேபிய சபாநாயகர் தெரிவித்தார்.

சுமார் 1 இலட்சத்து 36 ஆயிரம் இலங்கையர்கள் தற்போது சவுதி அரேபியாவில் பணியாற்றும் அதேவேளை, அவர்களது வினைத்திறனான சேவையை பாராட்டியதுடன், மேலும் அதிகளவிலான இலங்கையர்களுக்கு வேலைவாய்ப்புகளை பெற்றுக்கொடுப்பதற்கும் தமது அரசாங்கம் கவனம் செலுத்துவதாக சவுதி அரேபிய சபாநாயகர் தெரிவித்தார்.

பயங்கரவாதத்திற்கு எதிராக நடவடிக்கை எடுத்தல் இலங்கையைப் போன்றே சவுதி அரேபியாவினதும் குறிக்கோளாகும் எனவும், பயங்கரவாதம் என்பது குறித்தவொரு சமயத்திற்கோ இனத்திற்கோ வரையறுக்கப்பட்டது அல்ல என்பதையும் அவர் இதன்போது சுட்டிக்காட்டினார்.

ஜனாதிபதியின் செயலாளர் உதய ஆர்.செனெவிரத்ன, பாராளுமன்ற செயலாளர் நாயகம் தம்மிக தசநாயக்க மற்றும் இலங்கைக்கான சவுதி அரேபியா தூதுவர் உள்ளிட்ட இராஜதந்திரிகள் இச்சந்திப்பில் கலந்துகொண்டனர்.(நி)

 

Recommended For You

About the Author: Editor

error: Content is protected !!