ஜனாதிபதி நாளை யாழ் வருகிறார்!

‘நாட்டுக்காக ஒன்றிணைவோம்’ வேலைத்திட்ட நிகழ்வுகளில் கலந்துகொள்வதற்காக ஜனாதிபதி மைத்திரிபால சிறிசேன நாளைய தினம் யாழ்ப்பாணத்திற்கு விஜயம் செய்யவுள்ளார்.

யாழ்ப்பாணத்துக்கு நாளை விஜயம் செய்யும் ஜனாதிபதி, ஒரே நாளில் 8 நிகழ்வுகளில் கலந்து கொள்ளவுள்ளார்.

‘நாட்டுக்காக ஒன்றிணைவோம்’ தேசிய வேலைத்திட்டம் ஜனாதிபதி மைத்திரிபால சிறிசேனவின் அறிவுறுத்தலுக்கு அமைவாக நாடு முழுவதும் நடைமுறைப்படுத்தப்பட்டுள்ளது.

இந்நிகழ்வு யாழ்ப்பாணத்திலும் பிரதேச செயலகங்கள் ரீதியில் முன்னெடுக்கப்பட்டு வரும் நிலையில், இந்நிகழ்வின் இறுதிநாள் நிகழ்வு நாளை நடைபெறவுள்ளது.

அதில் கலந்துகொள்வதற்காக யாழ்ப்பாணத்துக்கு வருகைதரவுள்ள ஜனாதிபதி, யாழ்ப்பாணத்தில் பல அபிவிருத்தித் திட்டங்களை ஆரம்பித்து வைக்கவுள்ளார்.

இதற்கமைய பருத்தித்துறை மீன்பிடித் துறைமுகத்துக்கான அடிக்கல்லை மைத்திரிபால சிறிசேன நாட்டவுள்ளதுடன், அலுவலகம் ஒன்றையும் அங்கு திறந்துவைக்கவுள்ளார்.

யாழ்ப்பாண மாவட்டக் குடி தண்ணீர்ப் பிரச்சினையை தீர்ப்பதற்காக வடமராட்சியில் அமைக்கப்பட்டவுள்ள பெரும் நீர்த் தேக்கத்துக்கான பணிகளையும் ஆரம்பித்துவைக்க உள்ளார்.

சுன்னாகம், திண்ணை இயற்கை விவசாயப் பண்ணையில் இடம்பெறும் தேசிய நீர் இணைப்புக்கான ஒன்றுகூடலில் கலந்துகொள்ளவுள்ளார்.

இதேவேளை, யாழ்ப்பாணம் இந்து ஆரம்பப் பாடசாலையில் அமைக்கப்பட்ட கட்டடத்தைத் திறந்துவைக்கவுள்ளதுடன், யாழ்ப்பாண பழைய கச்சேரிக்கு அண்மையில் அமைக்கப்பட்ட ஸ்மாட் ஸ்ரீலங்கா கட்டடத்தைத் திறந்து வைக்கவுள்ளார்.

பிற்பகல் கைதடியில் அமைக்கப்பட்டுள்ள வடக்கு மாகாண கூட்டுறவு அபிவிருத்தி வங்கியைத் திறந்து வைக்கவுள்ளார்.

அதன் பின்னர் யாழ்ப்பாணம் முற்றவெளியில் நாட்டுக்காக ஒற்றிணைவோம் நிகழ்ச்சித்திட்ட மக்கள் சந்திப்பில் கலந்துகொள்ளவுள்ளார்.(நி)

 

Recommended For You

About the Author: Editor

error: Content is protected !!